A.chik Grammar-Mood aro Adverb aro Uarangni ma.arang.

    Mood:

Dakako ba ong.ako ma.manti dake dingtang dingtang mesokanirangko Mood minga. 

Mood-ni ma.arang ma.bri donga, uaranga:

1.Janapani ba Indicative Mood: Verb dakako ba ong.ako janapaiode, uan Janapani ba Indicative Mood ong.a.

Jekai: Kejing matchuko breaha. 

2.Pangchakani ba Subjunctive Mood: Je dakao ba ong.ao maiba gipin daka ba ong.a pangchaka, ua daka ba ong.ako mesokgipa verb Pangchakani ba Subjunctive Mood ong.a.

Jekai: Kejing tangkako on.na ku.rachakode, man.a  ka.dongbo. 

3.Ge.etani ba Imperative Mood: Je verb dakako ba ong.ako janapon ge.etako mesoka, uko Ge.etani ba Imperative Mood minga. 

Jekai: Matchuko Kejingona moangbo. 

4.Infinitive Mood: Je verb dakako ba ong.ako janapoba, ong.srangako mesokja, uko Infinitive Mood minga. 

Jekai: Skode na.a kam ka.na  man.a.  

  Adverb

Je  kattarang sal ba biap, ba badita, ba maikai onag.ako mesoke, verb ba adjective, ba gipin adverbko talata, uarangko Adverb minga. 

Ma.rang:

1.Anga da.o re.angna ine sing.ode, da o verb skani salko mesoka. Uandake knalo, ambino, minio aro ua gita kattarang Salko Mesokani Adverb ong.a.

2.Uamang bachi re.angaha ine sing.ode, bachi re.angani biapko mesoka. Indake bano aro ua gita kattarang Biapko Mesokani Adverb ong.a. 

3.Ia gure namen katangaha. Iano gure badita katangaha, namen uko mesokaha.

Manderang adita gong.rake a.ako o.aha. Iano gong.rake adverb ong a aro badita gong rake dakaha adita uko mesoka. Namen, adita, aro ua gita adverbrang Baditako Mesokani Adverb ong.a.

4.Na.a ka.sne ka-sne re angbo, Ia sentenceo re angara maikai ong.a, ka.sne ka.sne uko mesoka. Indake bakbak, gong.rake aro ua gita adverbrang Dakani ba Ong-ani Rokomko Mesokani Adverbrang ong.a.

NIBO :- Ka.sne, gong.rake, namedake, tom tome aro ua gita adverbrang bimangde participlerang ong.a, indiba sentenceo adverbni kam ka ani gimin adverbrang ong.a.

5.Na.a re.anggenma ? Oe, anga re.anggen. Ia sentenceo oe ku.rachakako mesoka. Ihing ine inode, uan jechakako mesoka. Oe, ihing, ra aro ua gita adverbrang Ku.rachakani ba Jechakani Adverbrang ong.a.

Uni gimin ia Grammaro adverbrangko ma.bonga dake sualaha; chong.motan. 

 1. Salko Mesokani adverb 2. Biapko Mesokani Adverb, 3. Baditako Mesokani adverb, 4. Dakani ba Ong.ani Rokomko Mesokani Adverb aro 5. Ku.rachakani ba Jechakani Adverb.